William Ruto yemeye gukorana na Raila Odinga umutuzo mu gihugu uraboneka

Muri Kenya, Perezida William Ruto yemeye imishyikirano na Raila Odinga, bituma Odinga atanga agahenge avuga ko kuri uyu wa mbere abaturage bagomba gukomeza akazi kabo nk’uko bisanzwe kuko nta myigaragambyo ihari.

Raila Odinga yatangaje ko kuri uyu wambere nta myigaragambyo ihari mu gihugu, bityo abaturage barasabwa gukora imirimo yabo nk’uko bisanzwe.

Ibi Raila Odinga abitangaje nyuma y’aho Perezida William Ruto yemeye kugirana ibiganiro na Odinga mu rwego rwo kureba ko mu gihugu hagaruka ituze kuko hamaze igihe abaturage bari mu myigaragambyo badakora.

Raila yagize ati”. Twashimishijwe n’icyemezo cyafashwe na Perezida Ruto cyo kwemera ko tugirana ibiganiro tukamwereka ibyo twifuza ko byashyirwa mu bikorwa”.

Ibi yabivuze kuri iki cyumweru ahitwa   Capitol Hill, Upper Hill mu mujyi wa  Nairobi.

Raila Odinga kuva amatora yarangira ntabwo yigeze yishimira ko yatsinzwe ahubwo yakomeje kuvuga ko habayeho uburiganya mu matora.

Odinga buri wambere na buri wa kane yari yarabihariye imyigaragambyo aho yasabaga ubutegetsi buriho gusubiza ibintu mu buryo bw’umwihariko aho ubuzima buhenze cyane by’umwihariko abaturage bo ntaho bikora.