Imbere ya Perezida Kagame APR BBC yasezerewe muri BAL 2024
Imbere ya Perezida wa Repubulika Paul Kagame, APR BBC yari ihagarariye u Rwanda mu mikino ya Basketball Africa League (APR BBC), yasezerewe muri iyi mikino nyuma yo gutsindwa na AS Douanes yo muri Senegal amanota 79-54.
Uyu mukino wabaye kuri iki Cyumweru, tariki 12 Gicurasi 2024, i Dakar muri Sénégal ukurikirwa na Perezida Paul Kagame ari kumwe na mugenzi we wa Senegal Bassirou Diomaye Faye.
APR BBC yasabwaga gutsinda umukino kugira ngo ibone itike yo gukina imikino ya nyuma izabera i Kigali, ni na ko byari bimeze kuri AS Douanes yari imbere ya y’abakunzi bayo bari buzuye Dakar Arena.
Ikipe y’ingabo yakinnye uyu mukino idafite ba kizigenza bayo babiri Noel Obadiah na Adonis Filer bavunikiye mu mukino wo ku wa Gatandatu wa Rivers Hoopers.
Uyu mukino watangiye wihuta ku mpande zombi amakipe yombi atsindana abifashijwemo na Axel Mpoyo na Mike Fofana.
Agace ka mbere karangiye APR BBC yatsinzwe na AS Douanes amanota 23 kuri 18.
Mu gace ka kabiri iyi kipe yo muri Sénégal yakomeje gukina neza cyane, abarimo Fofana na Maduk Akec bakomeza kwigaragaza.
Ku rundi ruhande Mpoyo yageragezaga gutsinda ariko akabura uwo bafatanya.
Habura umunota n’igice ngo aka gace karangire, ikinyuranyo cyazamutse kigera mu manota 14.
Agace ka kabiri APR BBC yagatsinzwe ku manota 10 kuri 21 ya AS Douanes, amakipe yombi ajya kuruhuka AS Douanes yatsinze amanota 44 kuri 28 ya APR BBC.
Mu gace ka Gatatu, Ikipe y’Ingabo yakomeje gukina nabi n’icyizere wabonaga ari gike, kongeraho amakosa menshi no gutakaza imipira cyane.
Aka gace karangiye APR BBC yatsinzwe na AS Douanes.
Mu gace ka nyuma iyi kipe yo muri Senegal yakomeje gukina neza no mu gace ka nyuma Harouna Amadou akorera mu ngata Fofana barushaho gutsinda.
Ni mu gihe APR BBC yari yamaze kwiyakira yashyize mu kibuga abatarabonye umwanya uhagije wo gukina nka Niyibizi Shema Larson, Chris Ruta na Mohamed Camara.
Umukino warangiye APR BBC itsinzwe na AS Douanes yo muri amanota 79-54, isoza ku mwanya wa nyuma mu itsinda ryiswe “ Sahara Conference”.
Gutsindwa uyu mukino kuri APR BBC byatumye isezererwa itabonye itike yo gukina imikino ya nyuma “Finales”, izabera i Kigali guhera tariki 24 Gicurasi kugeza tariki 1 Kamena 2024, nyuma yo gutsindwa imikino ine muri itandatu bakinnye.
Muri rusange Sahara Conference yarangiye iyobowe na Rivers Hoopers, ikurikiwe na AS Douanes, US Monastir na APR BBC ya nyuma yatsinze imikino ibiri gusa muri itandatu yakinnye.
Ku nshuro ya mbere kuva BAL yatangira muri 2020 imikino ya nyuma izakinwa igihugu cyayakiriye kidafitemo ikipe.
Amakipe umunani azakina imikino ya nyuma hashakwa ikipe izasimbura AL Ahly yo Misiri ifite igikombe giheruka cya 2023:
Fus Rabat( Morocco), Petro de Luanda( Angola), Cape Town Tigers ( Afurika y’Epfo), AL Ahly Sporting Club ( Misiri), AL Ahly Libya Sporting Club ( Libya), Rivers Hoopers (Nigeria), US Monastir (Tunisia) na AS Douanes ( Senegal).
