Serena Williams Ari Mu byishimo Nyuma Yo Kwibaruka Umwana Wa Kabiri
Serena Jameka Williams, umwe mu bagore bamamaye mu mukino wa Tennis ku Isi we n’umugabo we Alexis Ohanian, bari mu byishimo byo kwakira Umwana wabo wa Kabiri.
Serena Williams abinyujije muri video yashyize ku rubuga rwa TikTok, yatangaje ko yibarutse umwana we wa kabiri w’umukobwa yise Adira River Ohanian.
Williams, amagambo yakurikije ayo mashusho yagize ati “Ikaze malayika wanjye mwiza.”
Amashusho yasakaje ku mbuga nkoranyambaga, amwerekana ateruye uwo mwana yibarutse mu byishimo byinshi ari kumwe n’umugabo we Ohanian, ndetse n’umukobwa wabo w’imyaka ine Olympia.
Ohanian yanditse ku rubuga rwa X, rwahoze rwitwa Twitter, avuga ko yishimiye ko ubu mu muryango wabo huzuye ibyishimo n’urukundo.
Ati “Nishimiye kubamenyesha ko mu muryango wacu huzuyemo urukundo: havutse umukobwa wishimye kandi ufite ubuzima bwiza, na nyina ufite ubuzima. Ndanezerewe.”
Serena Williams yamaze ibihe muri Tennis bita ibyumweru 319, ari we mugore wa mbere ku Isi muri uyu mukino, ndetse yegukanye amarushanwa akomeye mu mukino wa Tennis ‘Grand Slam’ inshuro 23.
Umwaka ushize nibwo Serena Williams yasezeye muri uyu mukino, avuga ko agiye mu kiruhuko cy’izabukuru.
Uyu mugore muri Gicurasi uyu mwaka nibwo yemeje amakuru y’uko atwite, ubwo yifotozaga ku itapi itukuru mu birori bya Met Gala i New York.
Serena Williams wimyaka 41, uvukana na Venus Williams nawe wamenyekanye mu mukino wa Tennis, yemeranyije kurushinga na Alexis Ohanian, umwe mu bashinze urubuga rwa Reddit mu 2016.
